Теміртауда ашыққан иттер қожайындарының етін жеген
Көршілері пәтерден шыққан жағымсыз иіске шағымданған
Теміртау қаласындағы пәтерлердің бірінен үш адамның мәйіті табылды. Олардың етін үйде аш қалған иттері жеп тастаған.
Бұл туралы «Вечерняя Караганда» басылымы хабарлады.
Бір әйел мен екі ер адамның мәйітін көршілерінің шақыртуымен келген полицейлер мен өрт сөндірушілер тапты. Көршілері пәтерден шыққан жағымсыз иіске шағымданған.
Есікті бұзып ашып кірген құтқарушыларға питбул иттер тап беріпті. Кинологтар иттерді ұстап алған соң, полиция ішке кіріп, үш адамның мәйітін тапқан. Аш иттердің мәйіттің етін жегені анықталып отыр.
Қарағанды облысының полиция департаменті үш адамның өліміне қатысты қылмыстық іс қозғалғанын мәлімдеді.
- Мәйіттерден зорлық-зомбылық белгілері табылған жоқ. Үш адамның өліміне қатысты қылмыстық іс қозғалды. Өлімнің нақты себебін анықтау үшін тергеу амалдары жүргізіліп жатыр, - делінген полицияның ресми ақпаратында.
Фото: animals.pibig.info
MalimBlocks
