Түркістан облысында АГҚС-тағы жарылыстан адамдар қаза тапты

Түркістан облысында автогаз құю станциясында (АГҚС) жарылыс болып, екі адам көз жұмды, тағы үшеуі жарақат алды, - деп хабарлайды Malim.kz тілшісі.

Облыстық Төтенше жағдайлар департаментінің (ТЖД) мәліметінше, оқиға 21 наурызда болған.

"21 наурызда сағат 16:30-да Түркістан облысы ТЖД 112 пультіне Шардара ауданы, Жаушықұм ауылындағы автогаз құю станциясында газ колонкасының жарылғаны туралы хабарлама түсті", – делінген ресми ақпаратта.

Құтқарушылар оқиға орнына жеткен кезде жеңіл автокөліктің АГҚС-қа соқтығысуы салдарынан жарылыс болғанын анықтады. Қатты зақымдану салдарынан газ резервуарынан сұйытылған газ ағып, ауадағы газ қоспасы тұтанып кеткен. Өрт жақын жерде тұрған көлікке де шарпыды. Кейін өртсөндірушілер жалынды толықтай ауыздықтады.

"Оқиға салдарынан екі адам оқиға орнында көз жұмды, тағы үшеуі күйік жарақатын алды", – деп мәлімдеді ТЖД баспасөз қызметі.

Жарақат алғандардың бірі бірден ауруханаға жеткізілсе, кейін тағы екі адам өз бетімен медициналық көмекке жүгінген.

Фото: Pixabay.com