Үш күннен кейін ғана табылды: әйел сәбиін пәтерде қараусыз қалдырып кеткен

Әзербайжанда 39 жастағы әйел баласын жалдамалы пәтерде қараусыз тастап кеткен. Сәби үш күннен кейін ғана табылған, - деп хабарлайды Malim.kz тілшісі Oxu.az-ке сілтеме жасап. 

Гёйгёль ауданының 39 жастағы тұрғыны Айгүн Гадимова Товуз ауданындағы үйде нәрестесін қараусыз ұзақ уақытқа қалдырды деп айыпталды. Алайда әйел өзіне тағылған айыпқа келіспеді.

"17 наурызда сағат 11:00 шамасында баланы тамақтандырып, су бердім де, үйден шықтым. Кешке маған хабарласып, баланың ауруханада екені айтылды," – деді ол.

Бұл туралы Oxu.Az-қа Мемлекеттік отбасы, әйелдер және балалар мәселелері жөніндегі комитетінің өкілі Теймур Марданоғлу мәлімдеді. Оның айтуынша, бала бүгін Баку қаласына жеткізіліп, мемлекеттік балалар мекемесіне орналастырылады.

"Юхары Ойсүзлю ауылында қараусыз қалған бала анасымен бірге тұрмайды. Қазір ол Товуз аудандық ауруханасында. Бүгін оны Бакуге жеткізіп, мемлекеттік мекемеге орналастырамыз. Бұл оқиға бойынша Мемлекеттік комитет, Товуз ауданының атқарушы билігі және Ішкі істер министрлігі аудандық полиция бөлімімен бірлесе шұғыл тергеу жүргізіп, баланың өмірі мен қауіпсіздігін қамтамасыз ету шаралары қолға алынды. Гёйгёльдегі балалар мен отбасын қолдау орталығына жолданған сұраныс нәтижесінде отбасы туралы мәліметтер анықталды. Айгүн Гадимова некесіз туған баласына жауапкершілік алғысы келмей, оны бірнеше күн бойы жалғыз қалдырған. Қазір баланың денсаулығына ешқандай қауіп жоқ," – деді ол.

Фото: Pixabay.com