"Хуторлықтар ісі": Хасан Қасымбаевқа қатысты тергеу аяқталды

Талғардағы атышулы"Хуторлықтар" қылмыстық тобының жетекшісі деп аталған Хасан Қасымбаевқа қатысты қылмыстық іс бойынша тергеу аяқталды. Бұл туралы Ішкі істер министрінің орынбасары Санжар Әділов BES.media тілшісіне мәлімдеді, - деп хабарлайды Malim.kz тілшісі. 

Ресми мәлімдеме

"Қасымбаевқа қатысты қылмыстық істің тергеуі аяқталды. Қажет айыптар тағылды. Қазір ол қамауда отыр", – деді Санжар Әділов.

Контекст

Хасан Қасымбаев былтыр қарашада ұсталған болатын. Оны бірқатар БАҚ "Талғардағы "Хуторлықтар" ҰҚТ-ның басшысы" деп атады. Ол адам ұрлау және қасақана ауыр дене жарақатын келтіру бойынша күдікке ілінген. Қылмыс 2021 жылғы маусымда жасалған.

"Хуторлықтар" кімдер?

Бұл топ туралы сөз Шерзат Полат есімді 16 жастағы жасөспірімнің қазасынан кейін тарады. 2023 жылғы 4 қазанға қараған түні Талғар ауданындағы "Камажай" дүкені маңында болған төбелесте Шерзат ауыр жараланып, кейін ауруханада көз жұмды. Бұл оқиға қоғамда үлкен резонанс туғызып, бірнеше шенеунік қызметінен босатылды. Олардың қатарында Талғар ауданы әкімі аппаратының басшысы Аслан Қасымбаев та бар.

Бейресми деректерге сүйенсек, шабуыл жасағандар қатарында "Хуторлықтар" деп аталатын топтың мүшелері болған. Бұл атау Талғар маңындағы Хутор ауылының атымен байланысты. Топтың басшысы ретінде Хасан Қасымбаев аталды. Бірақ ол бұл мәліметтерді жоққа шығарып, ІІМ де мұндай қылмыстық топтың тіркелмегенін мәлімдеген.

"Хуторлықтар" атауы қайдан шықты?

2024 жылғы 18 сәуірде өткен сот отырысында марқұм Шерзат Полаттың әкесі – Қаржаубай Нұрымов сөйлеп, айыпталушылардың бірі Нұрбол Тоқтаубаев өз еркімен топқа қатыстылығын мойындағанын айтты. Нұрбол былай деген:

"Сендер бізді танымадыңдар ма? Мен Нұрболмын. Біз – хуторлықтармыз".

Фото: Хасан Қасымбаевтың әлеуметтік желісінен алынған