25 мамырда «Соңғы қоңырау» іс-шарасы өтеді: Оқу-ағарту министрі үндеу жолдады
Мамыр айында «Ынтымақ айы» айлығын өткізу жоспарланған.
Оқу-ағарту министрі Ғани Бейсембаев мектеп түлектеріне үндеу жолдады, деп хабарлайды Malim.kz.
Министр биылғы оқу жылы 25 мамырда аяқталатынын ескертті.
Осыған орай, оқу бағдарламаларын жыл бойына табысты меңгерген 3,8 миллионнан астам еліміздің оқушысы келесі сыныптарға көшірілсін. Мектептің 1-10 сынып оқушыларына «Білімім Отаныма» тақырыбындағы Бірыңғай сынып сағаттарын өткізу 24 мамыр - жұма күніне жоспарлансын. Бұл былтырғы жылдың қыркүйек айында енгізілген «Біртұтас тәрбие бағдарламасы» шеңберінде қабылданған жоспарға сәйкес ұйымдастырылуы тиіс.
Әріптестеріміздің ұсынысы бойынша елімізде мамыр айында - «Ынтымақ айы» айлығын өткізу жоспарланған. Оның аясында «Таза Қазақстан», «Игі істер», «Каникулда кітап оқиық» және т.б. шаралар қарастырылған, - дейді министр.
Сондай-ақ Ғани Бейсембаев еліміздегі 186 мың мектеп бітіруші үшін оқу жылының аяқталуына арналған «Соңғы қоңырау» іс-шарасын 25 мамырда өткізуді тапсырды.
Биылғы түлектер аталған іс шараны жоғары мәдениеттілікпен, ысырапшылдықсыз, даңғазалықсыз, рухани-адамгершілік деңгейінде өткізетіндіктеріне сенімдімін. Бұл болашақ түлектер үшін өнегелі дәстүрге айналған жаңа форматтағы жоғары мәдениетті алғашқы шара болары сөзсіз.
Оқу жылын аяқтауды сапалы ұйымдастыру және қауіпсіздік шараларын сақтау бойынша өңірлік білім басқарамаларының басшыларына дербес жауапкершілік жүктеймін, - дейді министр.
Еске салсақ, бұған дейін Оқу-ағарту министрлігі су тасқынының болуы және 25 мамырдың демалыс күніне сәйкес келуіне байланысты 24 мамыр күні барлық мектепте 2023-2024 оқу жылының аяқталуына арналған сынып сағаты ұйымдастырылатынын, «Соңғы қоңырау» іс-шарасы өткізілмейтінін мәлімдеген болатын.
Фото: ortcom.kz
Байланысты жаналықтар
MalimBlocks
