Астанада былтыр 6700-ден астам жарнама алынып тасталған
Бұл «Жарнама туралы», «Тіл туралы» заңдарға сәйкестендіру үшін жасалған
Астанада былтыр ғимараттардың қасбеттерінен 6700-ден астам жарнама элементі алынып тасталды, деп хабарлайды Malim.kz.
Қала әкімдігі ресми сайтының жазуынша, 2024 жылы 1315-тен астам ғимарат пен құрылыстың қасбетіне визуалды тексеру жүргізіліп, 7400-ден астам кәсіпкерлік субъектісіне ғимараттардың (құрылыстардың) қасбеттерін сәулет-көркемдік жобалау мәселелері бойынша қолданыстағы заңнама талаптары түсіндірілген.
Елорданың біртұтас сәулеттік-көркемдік келбетінің талаптарына сай келмейтін 6700-ден астам заңсыз орналастырылған сыртқы жарнама элементі мен маңдайшалар жойылған.
Айта кетейік, бұл шаралар Астанада қаланың сыртқы келбетін «Жарнама туралы», «Сәулет, қала құрылысы және құрылыс қызметі туралы» және «Тіл туралы» заңдардың талаптарына сәйкестендіру үшін атқарылып жатыр.
Фото: Астана қаласы әкімдігі
