Баянауылда қарақұрт қаптап барады
Шөптер мен өсімдіктердің арасынан қарақұрт өрмекшілері, жұмыртқалары, қабықтары табылды
Павлодардың Торайғыр көлінің аумағында қарақұрт көбейіп бара жатыр. Ұлттық парк қызметкерлері осы жағдайға алаңдаушылық танытып отыр. Қызметкерлер оларды күн сайын қолмен жинап, жойып жатқанымен одан келген нәтиже көңіл көншітпейді.
Баянауыл ауданының әкімі Ардақ Кісентаев жергілікті ұлттық парктің және төтенше жағдайлар департаментінің қызметкерлерімен бірлесіп, қарақұрттардың мекендейтін жерлерін зерттеу үшін Торайғыр ауылына барды.
«Зерделеу барысында Торайғыр көлінің бойындағы шөптер мен өсімдіктердің арасынан қарақұрт өрмекшілері, жұмыртқалары, қабықтары табылды. Павлодар облысының төтенше жағдайлар департаменті төтенше жағдайлардың алдын алу және жою жөніндегі комиссияның кезектен тыс отырысын өткізуге бастамашылық жасады. Одан соң Торайғыр ауылында қарақұрттың таралуына қатысты кезектен тыс жиын өткізілді. Онда Баянауыл мемлекеттік ұлттық табиғи паркінің ғылым бөлімінің қарақұрттарға қарсы жүргізіліп жатқан жұмыстары туралы баяндалып, қауіпті жәндіктің әрі таралуы бойынша болжамдар мен оларды жою әдістері қарастырылды», - деп хабарлады өңірлік Төтенше жағдайлар департаментінің баспасөз қызметі.
Қазіргі уақытта жағдайға толықтай талдау жүргізілуде және қарақұртпен күрес бойынша жедел шаралар қабылдау үшін Торайғыр ауылында жергілікті ауқымдағы табиғи сипаттағы төтенше жағдай режимін жариялау мәселесі қаралып жатыр.
Фото: commons.m.wikimedia.org
Байланысты жаналықтар
MalimBlocks
