Марат Сұлтанғазиев сияқты әкім жоқ, мақтау да, балмұздақ та артық етпейді

Кеше ғана Алматы облысының әкімі Марат Сұлтанғазиевтің бір кадрды екі-үш қызметке тағайындаудан жыл бойы қолы босамай жүргенін, өзі таңдап тағайындаған қызметкердің алды сыбайлас жемқорлық бойынша күдікке ілінгенін жазған едік.  Мұндайда айтып ауыз жиғанша деуші ме еді,

Марат Сұлтанғазиев бүгін Алмас Батановты өзінің орынбасары етіп тағайындады. Алмас Батановтың іскерлігі мен біліктілігіне уақыт төреші.

Айтайын дегеніміз, Марат Сұлтанғазиев Алмас Батановты былтыр тамыз айында Алматы облысының жолаушылар көлігі және автомобиль жолдары басқармасының басшысы еткен болатын. Енді міне, жарты жыл өтпей жатып, қызметін ауыстырып жатыр. Ал жолаушы көлігі басқармасына тағы да жаңадан адам алып келмек.

Алматы облысы әкімдігіндегі кадр саясатында тұрақтылықтың жоқтығын өткен мақаламызда қысқа қайырып жазған едік. Ондағы мақсатымыз сын мен мін іздеу емес. Барды бар деп айту. Жалпы,  Марат Сұлтанғазиевтің атқарып жатқан нәтижелі жұмысы да жетіп артылады. Мәселен,  Алматы облысы әкімдігіне қарасты, ішкі саясат басқармасы қадағалап отырған әлеуметтік желідегі әкімдіктің ресми парақшасының жазуынша, әкім «елім деген ер» екен.

Бүй дейді: «Алматы облысының әкімі Марат Сұлтанғазиев жұмыс барысымен алты ай ішінде Ұйғыр ауданына екі қайта баруы, елім дейтін ердің сапары екенін көрсетті. Өз мүддесін емес, өз елінің қамын бірінші орынға қойған облыс басшысы...».

Көрдіңіз бе, Алматы облысының әкімі қандай басшы екенін! Ал оны кім мақтап отыр? Әкімдік қызметкерлері ме? Онда тұрған не бар! Әкімді әйтеуір біреу мақтауы керек емес пе! Марат Сұлтанғазиев енді бір мәрте Ұйғыр ауданына елдің қамын ойлап барса, онда оған мемлекеттік награда беруге де болады. Ішкі саясат басқармасы бос отырмай, құжаттарын дайындап та жатқан шығар...