«Нүкенованың ағасының үстінен қылмыстық іс қозғалды»: ІІМ мәлімдеме жасады

ІІМ Салтанат Нүкенованың ағасы Айтбек Амангелдінің үстінен қылмыстық іс қозғалғаны туралы әлеуметтік желіде пайда болған ақпаратқа қатысты мәлімдеме жасады, деп хабарлайды Malim.kz.

Ведомстводағылар жалған ақпарат таратуға қатысты қылмыстық іс қозғалғанын алға тартты. Қазір тексеру жұмыстары жүріп жатыр. Алайда Нүкенованың ағасына қатысты ештеңе айтылмаған. Желіде арызды Қуандық Бишімбаевтың әкесі жазған болуы мүмкін деген мәлімет бар.

Бұған дейін Ермұхамет Ертісбаев өзінің YouTube-арнасында Нүкенованың ағасының үстінен қылмыстық іс қозғалғанын айтып еді.  

Ал Айтбек Амангелдінің өзі Instagram-да қылмыстық іс жайлы бейхабар екенін, тиісінше ІІМ-ге сұрау жібергенін алға тартты.

ҚР Ішкі істер министрлігіне сұрау жібердім. Ең алдымен сотқа дейінгі істердің тіркелгені жөнінде сұрадым. Білуімше, маған қатысты қылмыстық іс қозғалмаған, - деді ол тікелей эфирде.

2024 жылғы 13 мамыр күні әйелін өлтірді деген экс-министр Қуандық Бишімбаевқа сот үкімі шығып, ол 24 жылға бас бостандығынан айырылды.

Фото: Жоғарғы сот