Орамалдылардан көңілі қалған танымал блогер хиджабын шешіп тастады
Біраз уақыт бойы хиджаб киген блогер өзінің ниеті басқа екенін түсінген.
Танымал блогер Сәния Ілиясова хиджабтан бас тартты. Instagram парақшасында жан сырын ақтарып, орамал таққандардан көңілі қалғанын айтты, деп хабарлайды Malim.kz.
Блогер енді ешкімнің көзқарасына тәуелді болмай, жүрек қалауымен өмір сүретінін атап өтті.
Орамалымды шештім. 2 ай бойы эмоцианалды толқыныста болдым, өзімді іздедім… Өзім үшін де, өзгелер үшін де әрдайым шынайы болғым келеді. Сіздерге ол ұнай ма, ұнамай ма білмеймін, тек жүрегімнің қалауымен өмір сүремін. Эгоисттік пе? Бәлкім, иә. Солай болуы керек. Мен "мәңгілік" және "ешқашан" деген сөздерді айтуға болмайтынын түсіндім. Өйткені Алланың өз жоспары бар, - деп жазды ол.
Орамал тағудағы ниеті басқаша болғанын түсінгенін жасырмады.
Айтпақшы, Меккеге сапарымнан кейін өзімді биікте болғандай елестетіп едім. Иманым-орамалым болады деп сендім. Бірақ мен күткеннен басқа нәрселер орындалып, Алла маған менің орамал тағудағы ниетімді көрсетіп берді. Бұл бір қызық болды. Алла разылығы үшін болмаған екен. Көңілім қалды... Орамалдылардан, олардың өмірдегі және инстаграмдағы кейіптерінен көңілім қалды, - деп жазды ол.
Блогер болашақта орамалға қайта келетінін және орамалды ханымдарға арналған киім-кешек шығаруды тоқтатпайтынын айтты.
Әзірге осылай. Бәлкім бір айдан соң немесе бір жылдан кейін, 5 жылдан кейін тірі болсам, орамалға қайта келетін шығармын. Болашақты болжап, ештеңеге кепілдік бере алмаймын. Бәрі Алланың қалауымен болады. Оранғандарға арнап әдемі киімдерді шығара беремін. Бұл істі сондай жақсы көремін. Тіпті басқа істеген істерімнен де артық көремін. Сіздер үшін жасаған әр ісім үшін бақытты боламын. Алдағы уақытта нәпсім, мақтанышым үшін ғана емес таза ниетпен орамалдың мәнін ұққанда, тыныштықты Құдай мен менің арамдағы нәрсе екенін түсінгенде ғана ораламын - деді ол.
Фото: видеодан кадр
