Паспорт пен жеке куәлікті биометриялық сәйкестендіруді пайдалана отырып терминал арқылы беру қарастырылып жатыр. Цифрлық даму, инновациялар және аэроғарыш өнеркәсібі министрінің және Қазақстан Республикасы Ішкі істер министрінің бірлескен бұйрық жобасы «Ашық НҚА» порталында жарияланды, деп хабарлайды Malim.kz.
Пилоттық жоба процесті ұдайы жетілдіру, мемлекеттік қызметтер көрсетудің тиімділігін арттыру, сондай-ақ, ел азаматтарына паспорттар, жеке куәліктер беру мәселелері бойынша Халыққа қызмет көрсету сапасын жақсарту жөніндегі жұмысты ұйымдастыру мақсатында әзірленген.
Пилоттық жобамен республикалық маңызы бар қалаларда және астанада, облыстардың әкімшілік орталықтарында, сондай-ақ, Байқоңыр қаласында қолданыстағы тәртіпке балама нұсқа ретінде «Азаматтарға арналған үкімет» фронт-офистерінде 2025 жылғы 1 қаңтардан бастап 2025 жылғы 31 желтоқсанға дейін іске асырылады.
Фото: gov4c.kz
