Белгілі қайраткер жазушы, өлкетанушы Кәмел Жүністегі өмірден озды. Ол 1939 жылы 27 қаңтарда Шет өңірінде, Ақсу-Аюлы ауылында дүниеге келген. Сөз зергерінің қаламынан «Дос көңілі», «Көне хикая», «Көксеу», «Көксеңгірдің тасында», «Соңғы Абыз», «Шырағдан» кітаптары туған.
Қаламгер өткен ғасырдың 60-шы жылдары, қылышынан қан тамған Кеңес кезеңінде Елін сүйген ерлер партиясы яғни «ЕСЕП» атты партия құрған. Жастардың бұл әрекеті КГБ-ның тұзағына ілініп, соның жазасын Сібірде өтеп қайтқан.
Әуесқой композитор ретінде «Арқа самалы», «Аяулым», «Домбыра», «Туған жер» әндерін жазған. Сондай-ақ, коллекционер ретінде Арқа домбыраларының алты түрін жинап, үйінде сақтады. Олардың арасында атақты Қыздарбек күйшінің шәкірттері Әбди, Сембек және Қақпан ақынның домбыралары бар. Қазақтың ұлттық өнері жайында бірнеше зерттеу мақалаларын жазды. Кәмел Жүністегі Қазақстан Жазушылар одағының басқарма мүшесі, ҚР Мәдениет қайраткері, «Құрмет» орденінің, С.Сейфуллин атындағы сыйлықтың иегері.
