20 жылдан кейін Жақияновты неге тексеруде?

Сыбайлас жемқорлыққа қарсы күрес департаменті Павлодар облысының бұрынғы әкімі Ғалымжан Жақиянов және басқаларға қатысты сотқа дейінгі тергеуді бастады. Антикордың мәлімдемесінде Ғ.Жақияновқа қандай айып тағылғанын «тергеу жұмысының құпиялығын сақтау үшін заңға сәйкес мәліметтер жария етуге жатпайтыны» айтылған. Осыған орай саясаттанушы Шалқар Нұрсейітов әлеуметтік желіде «Абсурд саяси істер жайлы» өзінің пікірін білдірді. «2022 жылы Қазақстанда саяси тұтқындардың саны 11 есе өскен. Қазір Қазақстанда 47 саяси тұтқын бар, оның ішінде 30 адам түрмеде, 17 адам тергеу изоляторында отыр.  Көп жағдайда саяси тұтқындар абсурд жаламен сотталып жатады. Қазіргі таңда сол абсурд істердің ең танымалы қатарына Марат Жыланбаев пен Думан Мұхамедкәрімнің кейстері кіруі мүмкін. Қазір екі азамат авторитар режимге қарсы саяси көзқарасы мен белсенділігі үшін «экстремист» атанып, сотталуы әбден мүмкін. Жақын арада абсурд саяси істер осымен шектелмейтіндей көрінеді. Олардың қатарына қосылуға потеницалды тағы бір кейс пайда болып келе жатқан секілді. Ол - кезіндегі «ДВК»-ның негізін қалаушылардың бірі болған, Павлодар облысының экс-әкімі Ғалымжан Жақияновқа қарсы 20 жыл бұрын қозғалған қылмыстық істің қайта қозғалуы»,- деп жазды саясаттанушы.

Қозғалып жатқан іске байланысты Ғалымжан Жақияновтың өз пікірін білмек болып әлеуметтік парақшалары мен whatsapp желісіне хабарласып едік жауап ала алмадық.