Әлнұр Ілияшевке сот үкімі шықты
Бүгін "Төтенше жағдайда жалған ақпарат таратты" деген айып тағылған азаматтық белсенді Әлнұр Ілияшевке сот үкімі шықты.
Судья Залина Махарадзе Әлнұр Ілияшевті Қылмыстық кодекстің 274-бабы 4-бөлімі бойынша айыпты деп танып, 3 жылға бас бостандығын шектеу жазасына кесті. Сондай-ақ ол жаза мерзімі аяқталғанша жылына 100 сағат қоғамдық жұмыстарға тартылады. Сондай-ақ ол уәкілетті мемлекеттік органға хабарламай, тұрғылықты жер мен жұмысты ауыстыра алмайды.
Ә.Ілияшевтің тәртібін жаза мерзімі аяқталғанша пробация қызметі бақылайды. Сонымен қатар Ә.Ілияшев сот үкім бойынша, бес жыл бойы қоғамдық және саяси қызметпен айналыса алмайды.
Судья белсенді бас бостандығын шектеу жазасынан жалтарса, бас бостандығын шектеу жазасы бас бостандығынан айыру жазасына өзгертілетінін ескертті.
"Сот үкімін түсіндіңіз бе? Кінәңіз дәлелденді. Балаларыңыз бар болғандықтан және осы уақытқа дейін сотталмағаныңызды ескеріп, жазаны жеңілдеттік" деді судья З.Махарадзе.
"Одан да түрмеде қалсам бола ма? Барлық мүмкіндіктен айырдыңыз", - деді Ә.Ілияшев.
Ә.Ілияшев сот процесі кезінде өзіне тағылған кінәні мойындамаған.
Белсенді Әлнұр Ілияшев 17 сәуір күні "төтенше жағдай кезінде жалған ақпарат таратты" деген күдікпен ұсталған. Алматы қалалық полиция департаменті «күдікті жұртты әдейі жаңылыстыратын ақпарат таратты, полицияның ескертуіне құлақ аспады. Ол тіпті ар-намыс пен іскерлік беделді қорғау ісі бойынша өткен соттан да тиісті қорытынды жасамады. Сот үкімі бойынша, Ілияшев бұрын таратқан ақпаратты теріске шығаруға міндетті еді», – деп хабарлады.
Халықаралық құқық қорғау ұйымдары Қазақстан билігінен Әлнұр Ілияшевті қамаудан босатып, қылмыстық істі тоқтатуға шақырған.
Самое читаемое
