Алматыдағы орталық саябақ аумағына жатақхана салуға рұқсатты «Нұр Отан» партиясы төрағасының бірінші орынбасары Бауыржан Байбек берген.
Абай атындағы ҚазҰПУ проректоры Ғабит Дулатовтың сөзінше, саябаққа тиесілі жерге жатақхана салуға рұқсатты 2018 жылы қала әкімі Бауыржан Байбек берген.
«Мына жерге келетін болсақ, бұнда 4 гектар жер бар. Ол Спорт және туризм колледжінің балансынан Абай атындағы ҚазҰПУ қарамағына 2011 жылы қалалық әкімдік (бұл уақытта Алматы қаласының әкімі Ахметжан Есімов болған - ред) берген... 2018 жылы Алматы қаласы әкімінің шешімімен бізге бұл жерге жатақхана салуға рұқсат берілген. Мемлекеттік акт, шешім бойынша бұл біздің жеріміз. Бұл жердің иесі бізбіз. 10 жылдан бері жердің иесі біздің университет. Біз жатақхана салуға байланысты әкімшілікке жүгіндік. Осындай жер бар екенін айттық, әкім шешімімен бізге рұқсат берілді. 2018 жылы кім болды? Байбек. Байбектің шешімі бойынша...», - деді Дулатов.
Проректордың айтуынша, университеттің жатақхана салатын жері жоқ. Егер әкімшілік басқа жер беретін болса, онда сол жерге жатақхана салуға дайын.
«Қазіргі уақытта біз министрлік және қаламен бірге өзге де нұсқаларды қарап жатырмыз. Қазір бізде, университетте студенттерге арнап жатақхана салатын жер жоқ. Біз әкімдікке шығамыз. Олар бізге басқа жақтан жер берсін. Осы инвестормен сол жерге жатақхана сала аламыз... », - деді Дулатов.
Саябақ жеріне жатақхана салуға қарсы белсенділердің айтуынша, саябақ аумағы ашылған уақытынан бері үш есеге кішірейген. Бұрындары саябақ аумағы 120 гектар болған. Қазір одан 42 гектар ғана қалған. Белсенділер бастапқыда жатақхана ретінде салынатын нысан, болашақта коммерциялық мақсаттарға пайдаланылады деп есептейді. Белсенділер 18 ақпанда аталмыш мәселеге байланысты президент Қасым-Жомарт Тоқаевтың атына үндеу де жасаған.
Естеріңізде болса, бұған дейін Әл-Фараби атындағы қазақ ұлттық университетінде де жер дауы шыққан. Бірақ онда университеттің 0,7495 га жері «OMIREX ЖШС»-ға уақытша пайдалануға берілген. Кейіннен бұл компанияға «Joint Technologies» компаниясы арқылы экс-президент Нұрсұлтан Назарбаевтың күйеубаласы Тимур Құлыбаев иелік ететіні белгілі болған. Бұл жерде 2017 жылы Бауыржан Байбек әкім болып тұрған уақытта берілген.
Жер дауы шыққан уақытта университет ректоры Ғалымқайыр Мұтанов қызметінен кетіп, оның орнына Жансейіт Түймебаев келген.
Байланысты жаналықтар
MalimBlocks
