«Ел дауысы» қорының басшысы Аида Жексенова Өскемендегі тәуелсіз бақылаушылармен кездесіп, тренинг өткізді.
Бұл жиында алдағы сайлауға дайындық мәселесі талқыланды. Тренингке қатысушылар бақылаушылардың жұмысының маңызды қырлары туралы сұрады. Олардың көбі сайлауға бақылаушы ретінде алғаш рет қатысқалы отыр.
Бақылаушылар сайлау учаскесіндегі заң бұзушылықтар мен алаяқтықтың алдын алуға көмектеседі. Олар заңға сәйкес әрекет етеді және дауыс беру мен дауыстарды санау процедураларының сақталуын бақылайды, заң бұзушылықтарды тіркейді. Сондықтан олардың жұмысы аса үлкен жауапкершілікті талап етеді. Осы ретте Аида Жексенова бақылаушылардың құқықтары мен міндеттері және дауыс беру тәртібі жөнінде толыққанды мәлімет берді. Ол үгіт-насихат жұмыстарына неге араласуға болмайтынын және бейтарап көзқарас ұстанудың маңызы жайлы айтып өтті.
Айта кетсек, «Ел дауысы» қоры 2020 жылы құрылған, сайлау процесстеріне мониторинг жүргізеді, оның құрамына Қазақстандағы сайлаудың ашықтығын қалайтын белсенділер кіреді.
Бұған дейін Аида Жексенова Павлодар қаласында осындай тренинг өткізген екен. Одан кейін Семей, Өскемен қалаларына келген.
- Павлодарда бізде учаскеге егде жастағы адамдар шығатын болса, Өскемен мен Семейде жағдай басқаша – мұндағы тренингтердің аудиториясы негізінен студенттер мен жастардан тұрады, - дейді Аида Жексенова.
Алдағы күндері қор өкілдері Петропавл, Қостанай, Көкшетау қалаларына баратынын хабарлады.
Фото: Аида Жексенованың Facebook парақшасынан алынды
Байланысты жаналықтар
MalimBlocks
