Қарағанды облыстық экономикалық соты "пара алды" деп айыпталған судья Ержан Ғабдуллинге не істерін білмей жүрген тәрізді.
Ratel.kz басылымының жазуынша, ақпанның 23-і күні кешке Қарағанды облыстық мамандандырылған ауданаралық экономикалық соты Facebook парақшасында судьялардың тізімі көрсетілген пост жарияланған. Тізімде Ержан Ғабдуллиннің аты болмаған. Кейіннен пост өшірілген. Бірақ басылым жазбаны скриндеп үлгерген.
Қарағанды облыстық экономикалық сотында 16 судья жұмыс істейді. Соттың ресми сайтында жарияланған судьялар тізімінде Ержан Ғабдуллиннің аты-жөні көрсетілген. Осы уақытқа дейін Ғабдуллиннің қызметінен босатылғаны жөнінде ешқандай ресми мәлімдеме жасалған жоқ. Бірақ, оның әріптестері «Ғабдуллинді тізімге бір қосып, бір өшіріп» қимастықтарын қалай білдірерлерін білмей жүрген сияқты.
Ақпанның 6-ы күні «Ержан Ғабдуллиннің 30 мың доллар пара алды деген күдікпен ұсталғаны» жөнінде БАҚ-та ақпарат тараған. Болжам бойынша, судья параны құны 3 млрд теңге болатын ірі мемлекеттік тапсырысқа қатысты сот ісін ЖШС «Оливия» құрылыс комапиясының пайдасына шешу үшін алған. Бірақ БАҚ-та тараған ақпаратқа сүйенсек, 30 мың доллар пара Ербол Майпасов есімді Қарағанды облыстық экономикалық сот судьясына берілуі тиіс болған. Жемқорлық дауында Майпасовтың аты аталғанымен ол судьялар тізімінен алынып тасталмаған, әлі күнге дейін өз орнында қызметін атқаруда.
Байланысты жаналықтар
MalimBlocks
