Ерлан Қошанов: Түркі кеңістігінде жан-жақты байланыс керек

Баспасөз мәлімдемесіне қарағанда, алдымен ұйымға мүше елдер Қазақстан, Әзербайжан, Қырғызстан және Түркия Парламенті жетекшілері ТүркПАның Кеңесі отырысында бас қосқан. Мәжіліс спикері Түркия тарапына қонақжайлық танытып, бүгінгі іс-шараны жоғары деңгейде ұйымдастырғаны үшін ризашылық білдірген. Биыл Түркі мемлекеттері Парламенттік Ассамблеясына 15 жыл толды. Биылғы жиынға  қонақ ретінде келген Түрікменстан Парламенті басшысы мен бақылаушы мәртебесіне ие Мажарстан Парламентінің өкілі қатысқан.  Ал Өзбекстан Олий Мажлисі Сенатының жетекшісі жиынға онлайн режимінде қатысқан.  

«Біздің мемлекет басшыларымыз түркі әлемінің дамуы жолында шексіз үлес қосып келеді. Осыдан бір жарым ай бұрын Анкарада Түркі мемлекеттері ұйымының кезектен тыс саммиті өтті. Онда көшбасшылар біздің бауырлас елдеріміз арасындағы өзара іс-қимылды одан әрі нығайтуға бағытталған маңызды шешімдер қабылдады. Осыған орай біз де өз тарапымыздан парламентаралық іс-қимыл арқылы көшбасшыларымыздың қарқынына ілесе білуіміз керек», – деп сөз сөйлеген екен Ерлан Қошанов.

Отырыс барысында күн тәртібіндегі энергетика, көші-қон және азық-түлік тақырыбы жан-жақты талқыланған. Бұл түркі мемлекеттері үшін өзекті мәселеге айналып отыр. Өз кезегінде, Мәжіліс спикері Ерлан Қошанов түркі кеңістігінде энергетикалық және азық-түлік қауіпсіздігін күшейтуге баса назар аударған. Көші-қон саласында да ынтымақтастықты арттыру қажет екенін айтқан. Бұл мәселені жан-жақты талқылау үшін халықаралық ғылыми-тәжірибелік конференция ұйымдастыруды ұсынған.

Ерлан Қошанов Қазақстан Түркі әлемінің қара шаңырағы ретінде түркі интеграциясының одан әрі дамуын қолдайтынын мәлімдепті.

«Биыл қазан айында Түркі мемлекеттері ұйымының 10-шы мерейтойлық Саммиті түркі әлемінің алтын бесігі – киелі Түркістан шаһарында  ұйымдастырылып, төрағалық Қазақстанға өтеді. Осы тұрғыда барлық түркі  бірлестіктерімен бірігіп, «Түркі әлемінің келешегі – 2040» бағдарламасын іске асыру бойынша іс-шаралар жоспарын қабылдауымыз қажет. Және Парламенттік Ассамблея ретінде оның орындалуын қадағалауға тиіспіз», – депті мәжіліс спикері. Спикер осы бастамалардың барлығын парламенттік дипломатия арқылы іске асыруға, түркі халықтарының бірлігі мен достығын одан әрі нығайтуға шақырған.

Отырыс соңында тараптар Анкара декларациясын қабылдаған. ТүркПА-ның келесі ХІІІ жиыны 2024 жылы Әзербайжанда өтпек.  

Анықтама үшін: «Түркі әлемінің келешегі – 2040» – түркі тілдес халықтар арасындағы қарым-қатынасты күшейтуге ықпал ететін бірегей бағдарлама. Құжатта түркі тілдес қоғамдастықтың ұзақ мерзімді мақсаттары көрсетілген. Ол сауда, транзит, энергетика, жасыл экономика, туризм, инвестиция, шағын және орта бизнес сияқты бағыттардағы ынтымақтастықты нығайтуды көздейді.