Қазақстан барлық елдерден гуманитарлы көмек сұраған. Мұны Sputniknews сайты Қазақстанның сыртқы істер министрлігіне сілтеме жасап хабарлайды.
Бұған дейін ресейлік "Коммерсант" басылымы Украина мен Түрікменстаннан өзге ТМД-дағы барлық ел Ресейден "коронавирусты анықтайтын тестер, маскілер, өкпені жасанды желдеткіш құралдарды жіберуді" өтініп, гуманитарлы көмек сұрағанын хабарлаған.
"Барлық елге гуманитарлы көмек көрсету жөнінде өтініш жолдадық, оның ішінде Ресей де бар", - дейді сыртқы істер министрлігі Sputniknews-ке берген жауабында.
Бұл хабар әлеуметтік желіде қызу пікірталас тудырды. Қоғам белсендісі Мұхтар Тайжан өз парақшасында мұны ұят жағдайға балап, "бай ел болып, қалай қол созып тұрған қайыршы елге айналдық? Мұнай ақшасы қайда? Ұлттық қор қайда?" деп сұраған. Бұған президенттің кеңесшісі Ерлан Қарин "мұнда тұрған ештеңе жоқ" деп жауап беріпті. "Бұл – қалыптасқан практика. Бұл белгілі бір мемлекеттің дәрменсіздігін көрсетпейді. Бұл өзара ресурс алмасу практикасы. Мысалы, Қытайдағы жағдай ушыққанда көптеген елдер Қытайға көмектескен, қазір керісінше. Ресей мысалы АҚШ-қа жіберуде, бірақ кейін бізге де көмек қажет болар деп мәлімдеген", – дейді Қарин.
Қазақстан бұған дейін АҚШ пен Қытайдан гуманитарлы көмек алып үлгерді.
