«Спутник V» вакцинасынан болған кері әсерлер мен жағымсыз жағдайларға байланысты азаматтарға өтемақы төленбейді. Бұл жөнінде Нұр-Сұлтан қалалық денсаулық сақтау басқармасының басшысы Тимур Мұратов мәлімдеді.
Мұратовтың сөзінше, екпеден кейін қандай да бір қиындықтар болатын болса, науқасқа өтемақы төлеу қарастырылмаған.
«Қазір өтемақы төлеу жөнінде айту қиын. Ешқандай өтемақы қарастырылмаған. Егер қандай да бір қиын жағдайлар болатын болса, онда ол стационарлық немесе амбулаторлық ем қабылдау негізінде міндетті медициналық көмек бойынша жүзеге асырылады», - деді Мұратов.
Оқи отырыңыз: Алексей Цой неге Ресей вакцинасын салдырмады?
Ақпанның 1-інен бастап Қазақстанда коронавирусқа қарсы жаппай вакцинация басталды. Бұған дейін Денсаулық сақтау министрі Алексей Цой COVID-19-ға қарсы жаппай ресейлік «Спутник V» екпесі салынатынын мәлімдеген. Бірақ министрдің өзі Ресей вакцинасын салдырудан бастартты. Оның орнына ол қазақстандық QazCovid-in екпесін салдырмақ. Естеріңізде болса, бірнеше күн бұрын президент Қасым-Жомарт Тоқаев та егер қазақстандық вакцина сынақтан сәтті өтетін болса, отандық екпені салдыратынын мәлімдеген.
