Кеше Премьер-министр Әлихан Смайылов экономиканы демонополизациялау жөніндегі комиссияның кезекті отырысын өткізді. Бұл туралы үкіметтің баспасөз қызметі хабарлады. Хабарламаға сай, теміржолға иелік ететін 25 компанияны мемлекет меншігіне беру ұсынылған екен.
Бұған дейін жауапты мемлекеттік органдарға салалық объектілер мен ұйымдарды жекешелендірудің негізділігіне, оның ішінде жеке операторларды құру тұрғысынан талдау жүргізу тапсырылған болатын.
Жүргізілген жұмыстардың нәтижесінде бірқатар коммуникациялық, инфрақұрылымдық және өндірістік компанияны мемлекеттік меншікке беру ұсынылды.
"Бүгінгі таңда республикалық меншікке бірқатар кәсіпорын мен мекеменің акциялары мен қатысу үлестері қабылданды. Атап айтқанда, "Көлік сервисі орталығы" АҚ мүлкінің құрамында ұзындығы 250 шақырым болатын 400-ден астам кірме теміржол желілері қабылданды", - делінген хабарламада.
Мемлекеттік меншікке ұзындығы 178 шақырым болатын 138 кірме теміржолына иелік ететін тағы 25 компанияны қабылдау жұмыстары жүргізіліп жатқаны белгілі болды.
Аталған компаниялардың мемлекет меншігіне қабылдануы темір жол инфрақұрылымы саласында делдалдарды болдырмауға және осы қызметтерге бизнес шығындарын азайтуға мүмкіндік береді.
Сондай-ақ комиссия отырысында жекешелендірудің кешенді жоспарынан халықтың тыныс-тіршілігін қамтамасыз ететін (жылу, электр, сумен жабдықтау және өзге де коммуналдық қызметтер) 205 объектіні алып тастау мәселесі талқыланды.
Сонымен қатар, комиссия жанар-жағармай нарығын, газ саласын және өңірлік электр желілік компанияларды демонополизациялау шараларын қарады.
Премьер-министр осы бағыттарда жоспарланған іс-шараларды жүзеге асыру үшін барлық қажетті құқықтық және ұйымдастырушылық мәселелерді пысықтауды тапсырды.
Байланысты жаналықтар
MalimBlocks
