АҚШ президенті Дональд Трамп 46-президент Джо Байденнің инаугурациясы алдында Ақ үйден кетті.
Ол жұбайы Мелания Трамппен бірге тікұшаққа отырып, Мериленд штатындағы әуе базасына бет алды. Ол жақтан Трамптар Флоридаға кетуі тиіс. Bloomberg-тің жазуынша, президенттіктен кеткен Трамп Флоридадағы Мар-а-лаго резиденциясында тұрмақ.
Трамп Байденнің инаугурациясына қатыспайтынын мәлімдеген. Байден оған қуанбаса, ренжіген жоқ. Тіпті бұл шешімді дұрыс деді. "Бұл пікіріміз тоғысқан сирек жағдай. Инаугурацияға келмеу оның өзі үшін жақсы", - деді Байден.
Әдетте АҚШ президенттері Ақ үйден кеткенде келесі президентті құттықтап хат қалдырады. Байден жеңісін мойындамаған Трамп олай жасайтыны-жасамайтыны соңғы сәтке дейін белгісіз болды. Бірақ Ақ үй өкілі Джад Дир Трамп Байденге хат тастағанын мәлімдеді.
Ақ үйде соңғы рет президент ретінде сөйлеген қоштасу рәсімінде Трамп "президент болу үлкен мәртебе" екенін айтты. Джо Байден мен Камала Харристің атын атамаса да, болашақ әкімшілікке сәттілік тіледі.
"Олар сіздердің салықтарыңызды өсірмейді деп үміттенемін. Бірақ өсірсе, мен олардың сөйтетінін ескерттім", - деді Трамп.
"Бұл ғажап төрт жыл болды. Мен қош болыңдар деймін, бірақ ұзақ уақытқа қоштаспаймын деп үміттенемін. Біз көп жетістікке жеттік. Біз қандай да бір формада ораламыз ғой", - деді Трамп.
