Маңғыстау облысының бұрынғы әкімі Серікбай Тұрымовтың парламент сенатында немен айналысатыны белгілі болды.
Маңғыстау облысында қуаңшылық болып, жаппай мал қырылу тұсында қызметінен кеткен Серікбай Тұрымов сенатта аграрлық мәселелер, табиғатты пайдалану және ауылдық аумақтарды дамыту комитетінің тұрақты мүшесі болып тағайындалды. Ол бүгін депутат ретінде ант берді.
Серікбай Тұрымов тұрақты мүше болып кірген комитетті «Ауыл» партиясының төрағасы Әли Бектаев басқарады. Комитет құрамында бұрынғы ауыл шаруашылығы министрі Ақылбек Күрішбаев та бар.
Серікбай Тұрымов президент Қасым-Жомарт Тоқаевтың жарлығымен қыркүйектің 7-і күні қызметінен кеткен. Оның орнына Маңғыстау облысының әкімі болып экс-энергетика министрі Нұрлан Ноғаев тағайындалған. Биыл Маңғыстау облысында қуаңшылық болып, мал қырылып, шаруалар жергілікті атқарушы биліктің жұмысын сынға алған. Бұған қоса, жыл басынан бері Жаңаөзенде мұнайшылар ереуілі басылмай келеді.
Фото: inbusiness.kz
MalimBlocks
