«Ұятсыз ұсыныстар жасады». Перуашев депутат Асқар Садықовтың партиядан шығарылу себебін айтты
Жәбірленуші барлық ұсынысты жауапсыз қалдырған
«Ақ жол» партиясының төрағасы Азат Перуашев депутат Асқар Садықовтың не себепті партия қатарынан шығарылғанын айтты.
Бұған дейін 55 жастағы мәжіліс депутатының өкілеттілігі мерзімінен бұрын тоқтатылған болатын. Ал "Ақ жол" партиясы оны өз қатарынан шығарып жіберді. Перуашевтің айтуынша, Садықовтың үстінен шағымдар түскен. Атап айтқанда, экс-депутат өкілеттігін асыра пайдаланған және этикалық нормаларды бұзған.
"Мәселен, парламентте (партияда емес) жұмыс істейтін бір әйел адам А.Садықовтың бірнеше рет ұятсыз ұсыныстар жасап, қысым көрсеткені туралы айтып арызданды. Ол өзінің сөзіне дәлел ретінде А.Садықовтан келіп түскен хабарламалардың скринін көрсетті", - дейді Перуашев.
Оның сөзінше, жәбірленуші барлық ұсынысты жауапсыз қалдырған. Ал Садықов жыныстық бопсалауды жүйелі түрде жалғастыра берген.
"А. Садықовтың депутаттық қолсұғылмаушылыққа ие екендігіне байланысты, харрасментке тап болған жәбірленуші құқықтық қорғауға жүгіне алмаған. Пленум барысында осындай әшкере болған заңсыз әрекеттерге жол берілмейтіндігі туралы ескертуіме жауап ретінде А.Садықов "өзінің депутат екенін және кімге не қаласа соны айтуға құқылы екендігін" айтты. Сондықтан, біз бұл кедергіні алып тастадық, ал, А.Садықовты депутаттық мәртебесінен айыру туралы қабылданған шешім жәбірленушіге ар-намысы мен қадір-қасиетін қорғауға мүмкіндік береді", - деп атап көрсетті партия басшысы.
Осы орайда Перуашев бұрынғы әріптесінің лайықсыз мінез-құлқын дәлелдейтін басқа да фактілер бар екенін мәлімдеді. Оған құқық қорғау органдары да назар аударуы мүмкін.
Фото: akzhol.kz
