Вице-премьердің жалақысы - 1 жарым миллион теңге
Премьер-министрдің орынбасары әрі Қаржы министрі Ерұлан Жамаубаев өзінің екі лауазымында 1,5 миллион теңге жалақы алады. Бұл туралы ол Үкімет отырысынан кейін журналистер сұрағына жауап берген кезде айтты.
«Жалақымды Қаржы министрлігінен аламын және вице-премьер ретінде қосымша ақы төленеді. Шамамен жалпы жалақым 1,5 млн теңгені құрайды. Ал министр ретінде-шамамен 1,3 млн теңге», - деді Жамаубаев.
Сонымен бірге министр шенеуніктердің декларацияларын жариялау туралы сұраққа да жауап берді.
«Бұл мәселе де жалпы талқыланып жатыр. Біз мемлекеттік қызметшілерміз, біздің жалақымызды жақсы білесіздер. Жыл сайын декларацияны кім тапсырамыз. Біз жалпыға бірдей декларациялау жолымен келе жатырмыз және 2025 жылға қарай республикамыздың барлық азаматы өздерінің жыл сайынғы декларацияларын жариялайтын, тапсыратын кезге келеміз. Сонда барлығы белгілі болады. Мен де өз декларациямды ұсынуға дайынмын», - деді министр.
