Жаркент әкімі Болат Омаровтың басы дауға қалды.
Сәуірдің 25-і күні kris_p_brothers_official инстаграм парақшасында Қорғас шекара маңындағы ынтымақтастық орталығындағы жүк көліктері төңірегіндегі дауға байланысты видео жарияланды.
«10 белсендіні ұстаған. Сол себепті халық Панфилов аудандық полиция басқармасының алдына жиналды. Барлығы Қорғастан келген. Жүк көліктерін өткізбей жатыр. Видеода Жаркент қаласының әкімі Болат Шәріпұлы. Қасында аудан әкімі Талғат Өмірәлиев темекі шекіп тұр. Видеода барлығы көрініп тұр», - делінген жарияланған бейнероликтің аңдатпасында.
Видеода бір топ адамның Панфилов аудандық полиция басқармасының алдына келгендігі, олармен Жаркент қаласының әкімі Болат Омаровтың дөрекі сөйлеп, жиналғандардың біріне: «сен не сөйлеп тұрсың, бәле іздеп тұрсың ба?», - дейді. Оның халықпен бұлай сөйлеуіне қарсы шығып: «әкім мырза, сізді халық сайлады ма? Халықты тыңдаңыз», - деген тағы бір адамға ол: «сен сайлаған жоқсың мені!», - дейді.
Осыған дейін Қазақстан мен Қытай шекарасынан тауар тасымалдайтын кәсіпкер, жүргізушілер Қорғаста наразылыққа шыққан. Олар «Нұрлы жол» өткізу бекетінде монополист «Еуротранзит» компаниясының көліктері кезексіз өтіп, қалғандарына шектеу қойылғанына шағымданған. Кейіннен бұл компанияға экс-президент Нұрсұлтан Назарбаевтың үлкен қызы Дариға Назарбаева мен оның қазіргі күйеуі делінетін Қайрат Шәріпбаевтың қатысы бар екені белгілі болған. Қорғастық жүргізушілердің өзі бұл компанияны «отбасынікі» деп атайды.
