Сәуірдің 19-ы күні Жаңаөзен қаласында «Бұрғылау» мұнай компаниясының мердігері «Фиркрофт» ЖШС жұмысшылары жалақыларын көтеруді талап етіп, президент Қасым-Жомарт Тоқаев пен облыс әкімі Серікбай Тұрымовқа үндей жасады.
Үндеуде мұнайшылар 19 сәуірден бастап жұмысты тоқтатқандарын айтады. Олар өздерінің бұндай қадамға компания басшылығы мен әкімдік мәселелерін шеше алмағаннан кейін барғандарын айтады.
«Біз 2021 жылдың 19-шы сәуірінен бастап жұмысты тоқтаттық. Себебі осы күнге дейін Жаңаөзен қаласының әкімдігі мен «Бұрғылау» мекемесінің басшылары біздің мәселемізді шеше алмады. Көптеген заңсыздықтар орын алып жатыр. Осы заңсыздықтар үш күн ішінде шешілмеген жағдайда Жаңаөзен қаласының өзге де мұнай мекемелерінің жұмысшыларынан қолдау көрсетулерін сұраймыз», - делінген үндеуде.
Әлеуметтік желіде жарияланған видеода «Бұрғылау» компаниясының бас директоры Мұстақим Беркалиевтің жұмысшылармен келіссөз жүргізіп жатқаны көрсетілген. Бірақ мұнайшылар талаптарының бірнеше жылдан бері орындалмай келе жатқанын айтып, басшылыққа «талаптары орындалмайынша ешкімнің жұмысқа шықпайтынын, қажет болған жағдайда астанаға дейін баратындарын» ескертті.
Соңғы уақыттары Қазақстанда мұнайшылар ереуілі жиілеген. Осыдан бірнеше күн бұрын Қызылорда облысында «Қуат Амлон Мұнай» компаниясының жұмысшылары жалақыларын өсіруді талап еткен. Қаңтар айында Ақтөбе облысында «КМК Мұнай» компаниясының мұнайшылары да айлықтарын көтеруді талап етіп, екі айға жуық уақыт ереуілге шыққан. Кейіннен компания басшылығы олардың талабын орындаған.
Байланысты жаналықтар
MalimBlocks
