Зейнеткер Назарбаевтың жүріс-тұрысына мемлекет ақша бөлмек
Жамаубаев Назарбаевқа бөлінетін қаражаттың нақты сомасын айтпады.
Зейнеткер Назарбаевтың қызметін қамтамасыз етуге 5,1 млрд теңге бөлінеді деген әңгіменің жаны бар сияқты. Бүгін Премьер-Министрдің орынбасары Е.Жамаубаев экс - президенттің жұмысына бюджеттен ақша қарастырылғанын растады.
Өткенде «Ашық НҚА» порталында Нұрсұлтан Назарбаевтың қызметіне 5,1 миллиард теңге бөлінетіні жазылған. Таратып айтсақ, оның Кеңсе жұмысына 2,6 миллиард теңге, қызметін қамтамасыз етуге 1,2 миллиард теңге, Тұңғыш Президент кітапханасының жұмысына 1,3 миллиард теңге жұмсалатыны хабарланған. Заң жобасы сәуірдің 21-не дейін өтетін қоғамдық талқылауға түседі делінген еді.
Бүгін Мәжілістің жалпы отырысында «2022-2024 жылдарға арналған республикалық бюджет туралы» ҚР Заңына өзгерістер мен толықтырулар енгізу туралы» заң жобасы мақұлданды.
Жамаубаев Мәжілістің жалпы отырысынан кейін журналистерге Назарбаевтың жұмысын дұрыс қамтамасыз етуге қаржы бөлінетінін мәлімдеді. Алайда ол бұл қаражаттың нақты сомасын ашып айтпады. Кейін деп күлбілтелеген министр арнайы сауал жолдануы тиіс деді. Заң жобасы Мемлекет басшысының биылғы жылдың басында берген тапсырмаларын және мемлекеттің басқа да шұғыл міндеттемелерін іске асыруға бағытталған. Аталған бағыттары бойынша бюджет шығыстары 2,7 трлн теңгеге артып отыр.
Биліктің бұл шешімі азаматтардың ашу-ызасын тудырып отыр. Қоғам қайраткері Балташ Тұрсынбаев «82-ге жасы келген зейнеткерге қандай кітапхана керек» дейді. Бізге мемлекет қанша зейнетақы төлесе оған да сонша көлемде зейнетақы берілуі керек деген пікірде. Тұрсымбаев Қазақстанның 170 миллиардтай шетелге қарыз екенін, бұл қарызды Назарбаев емес, біздің ұрпақтарымыз төлейтінін айтып қынжылыс білдірді.
Ал саясаттанушы Дос Көшім ақша бөлінбек түгілі, зейнеткердің иеленіп алған мүлкінің бәрін мемлекет қайтарып алғаны жөн дейді. Алайда жұртты жарылқап үйренген билік артқа қайтпайтын сияқты.
