Жириновскийдің қайтыс болғаны рас па?

Ресейлік сенатор Александр Пронюшкин Владимир Жириновскийдің өлімі туралы ақпаратты РИАНовостиге айтқан. Алайда Дума төрағасы Вячеслав Володин бұл ақпаратты жоққа шығарып, Жириновскийдің тірі екенін жазды. Осыдан кейін Ресей Денсаулық сақтау министрлігі депутаттың жағдайы бірқалыпты екенін және дәрігерлер бақылап отырғанын хабарлады.

Ақпан айының басында Жириновскийдің коронавирус салдарынан жағдайы нашарлап, комаға түскені белгілі болған. Наурыз айының ортасында оның хәлі мүшкіл деген ақпарат тараған.

Владимир Жириновский Ресейдегі ірі партия ЛДПР-дың төрағасы болып, алты рет ел президенттігіне сайлауға түсіп, бір рет Медведевтен, екі рет Ельциннен, үш рет Путиннен жеңілген. 1993 жылдан бері Ресей Жоғарғы Думасының депутаты болып келеді.

Ол 1946 жылы Алматы маңындағы ауылдардың бірінде дүниеге келіп, Қазақстанда орта білім алып, балалық шағын өткізген. Алайда ол Ресей Думасына енгеннен бері өзі туған ел жайлы "Қазақстан деген мемлекет жоқ", "Қазақстанның солтүстігі Ресейге тиесілі" деген мағынадағы пікір айтып келген. Оның Қазақстанда Жириновский атына көше аты берілуі керек деген пікірінен кейін қазақстандық жастар қоқыс жәшіктеріне Жириновский есімін берген. Ол тек қазақ халқына қатысты емес, грузин, әзірбайжан, қырғыз, шешен және тағы басқа ұлттарға қатысты негативті пікірлер айтып, басы дауға қалған.