Алматыда 12 мамырдан бастап электр энергиясы үшін берешегі бар абоненттерге жарық беру кезең-кезеңімен шектеледі. Бұл туралы "Алатау Жарық Компаниясы" (АЖК) ресми түрде хабарлады.
АЖК мәліметінше, электрмен жабдықтау күн сайын сағат 07:00-ден 20:00-ге дейін уақытша тоқтатылатын болады. Шектеулер тек берешек толығымен өтелмеген тұрғын үйлерге қатысты жүргізіледі. Жарықты қайта қосу тек қарыз толық өтелгеннен кейін ғана жүзеге асады.
"Электрмен қамту қарыз толық өтелгенге дейін уақытша тоқтатылады. Бұл шаралар меншік иелері бірлестіктері (ОСИ) және тұрғын үй кооперативтері арқылы жүзеге асады. Бұл адал тұтынушылар үшін қолайсыздықты азайтуға мүмкіндік береді", – делінген АЖК хабарламасында.
Компания өкілдері уақытша сөндіру – берешекті өндірудің ең тиімді тәсілдерінің бірі екенін атап өтті. Қазіргі таңда Алматы бойынша жалпы қарыз көлемі 1,2 миллиард теңгеге жеткен.
Энергетиктер тұрғындарды қарызды ертерек өтеуге шақырып, электр энергиясын үздіксіз пайдалану үшін төлемдерді уақытылы жүргізуге кеңес береді.
Фото: Depositphotos.com
