Шымкент хайуанаттар бағында көктемгі жандану кезеңі басталып, келушілерді үлкен қуаныш күтіп тұр. Бүгінде мұндағы басты жұлдыз — жақында ғана дүниеге келген кішкентай кенгуру. Әзірге ол уақытының көп бөлігін анасының қасында өткізеді, бірақ мамандардың айтуынша, ол көп ұзамай айналамен белсенді таныса бастайды. Бұл туралы Otyrar басылымы жазыпты.
Ең қызығы, бұл сүйкімді жануарға есімді қала тұрғындарының өздері таңдай алады. Зообақ әкімшілігі инстаграм парақшасында арнайы байқау жариялады, онда кез келген адам өз нұсқасын пікір ретінде қалдыра алады. Биолог Нұржан Көпжасаровтың айтуынша, кейіннен ғылыми бөлім сол ұсыныстардың ішінен ең лайықты есімді таңдап алмақ. Жаңа туған кенгурудың ата-анасы бейнетаспаға түсіруге де қарсы емес көрінеді, сондықтан бұл кішкентай мақұлық жақын арада әлеуметтік желілердің нағыз хитына айналуы әбден мүмкін.
Осы жыл Шымкент хайуанаттар бағы үшін өте берекелі болды. Кенгурудан бөлек, мұнда қара қасқырлар, Қытай қызыл қасқырлары, су құстары мен қара аққулардың төлдері өсіп келеді. Ал Баку хайуанаттар бағынан арнайы рейспен төрт макака-резус әкелінді, олар қазір жаңа ортаға бейімделу үстінде.
Күн жылынғалы бері келушілердің де қарасы көбейген. Хайуанаттар бағына кіреберісте қонақтарды «хостес» рөліндегі сүйкімді альпакалар қарсы алады. Ал Астана есімді жираф павильонда отырмай, вольерін маңғаз кезіп жүріп, балақайларды мәз-мейрам етуде. Айта кетерлігі, биыл билет бағасы көтерілген жоқ: ересектер үшін — 800 теңге, 6 жастан 17 жасқа дейінгі балаларға — 400 теңге, ал 6 жасқа дейінгі бүлдіршіндерге кіру - тегін.
Дегенмен, жануарларды жай ғана тамашалап қоймай, олар туралы тереңірек білгісі келетіндер үшін жаңа сервис түрі енгізілді. Енді келушілер биолог-гидтердің сүйемелдеуімен арнайы бағыт бойынша серуендеп, аң-құстар туралы қызықты деректерді тыңдай алады. Күн батқанша созылатын мұндай серуендер Шымкент тұрғындары мен қонақтары үшін нағыз танымдық демалысқа айналмақ.
