«Киноға түскім келмейді». Рүстем Жаныаманов өнерден кететінін айтты

Отандық танымал актер Рүстем Жаныаманов өнерден кетіп, басқа салаға бет бұруды жоспарлап жүр. Бұл туралы актердің өзі Жанар Байсемізге берген сұхбатында айтты, деп хабарлайды Malim.kz.

Жалықтым дегеннен Құдай сақтасын. Бірақ қазір Жанарға «кәсіпке қарай бет бұрғым келеді» деп көп айтып жүрмін. Өнерден кету ойда бар және ол солай болатын сияқты. Меніңше, өле-өлгенше өнерде жүрген дұрыс емес сияқты. Басқа саланы көру керек. Балалар өсіп келе жатыр. Оқыту керек, оңай емес. Өнерді сағынбаймын, қоштасуға дайынмын, деді Рүстем Жаныаманов.

Өнер иесі актер болудың да қиын тұстары көп екенін алға тартты. Сондықтан болашақта кадрдан тыс жұмыс істегісі келеді екен.

Жанарға кино бітсе, әлем аралауға кетейікші деп отырмын. Мұны да маған Жанар үйретті. Өзіміз бірнәрсе өндіріп шығарғымыз келеді. Мысалы, кітап, кино. Бірақ кадрдан тыс болғым келеді. Киноға түскім келмейді. Қазір кетпеймін, шамамен 40 жасыма дейін осы салада боламын. Өмірімде бір нәрсені өзгерткім келеді. Актерлердің проблемалары маған мәлім. Олардың ұйқысы дұрыс емес, сүйектері, белі ауырады, деді актер.

Фото: instagram.com/zhanyamanov_rustem