«Өмір-ай, көрсетпегенді көрсеттің-ау». Әнші Ақбота Керімбекова емшілерге қатысты сұмдық жағдайды айтты

Әнші Ақбота Керімбекова Instagram парақшасында әнін шырқап, трансқа түскен халықтың видеосын жариялады, деп хабарлайды Malim.kz.

Видеода әншінің «Әппақ гүлдер» әнін бір топ адам шырқап, олардың басында үкі таққан емшінің тұрғанын көруге болады. Өнер иесі ем іздеген халықты алдаған дүмше молданың әрекетін сынады.

«Бәрін көрдім» деуге болмайды десек те, маңдайымызға жазылған өнер жолының дәм-тұзы бұйыртып, көп нәрсеге қанықтық, бірақ, дәл мынадайды көру үш ұйықтасам да түсіме кірмепті. Әннің көңілге демеу, жанға медеу болатыны рас, солай екен деп дәл осылай жасауға бола ма?! Аңқау елге арамза молда болғандардың ақыры жақсы болғанын көргенім жоқ, адамдар бірнәрсеге тәуекел етіп немесе бірнәсеге кірісу үшін ақырын неге ойламайды екен осы?.., - деп жазды әнші.

Дегенмен, әнші ешкімді табаламайтынын айтып, адамдардың түзу жолдан ауытқымағаны жөн екенін атап өтті.

Әбден сарсаңға түсіп, қажығандарты, жанына тыныштық, дертіне дауа іздегендерді сендіру, көндіру оңай… мына үкілі кісінің алдында тұрғандар да бір ғажайыпқа сеніп келген шығар, оларды жазғыра алмаймын, қателік жасағанды табалау еш заманда да дұрыс болмаған. Ал, енді “аппақ гүлдетіп” тұрған кісіге Құдай сана берсін!.. Қасиетті кісілердің есімдерін қор қылды-ау… Сырдағы Серік Ыдырысов ағам айналасына “ақылыңды жойма, ақырыңды ойла”,-деп отырушы еді!.. Ай, өмір-ай, көрсетпегенді көрсеттің-ау Екінші трансында марқұм Нәби екеуміз орындаған “Ақ шағала” дейтін әннің музыкасына салып алып, ұрып тұр, - деп жазды әнші.

Фото: интернеттен