100 пайыз қазақ тілді балабақшаға әлі ерте

Оқу-ағарту министрі Ғани Бейсембаев қазақ балабақшасын көбейтеміз, мемлекеттік балабақша мемлекеттік тілде тәрбие берумен айналысады деп айтқан болатын. Осыған орай журналистер министрлік өкілінен 100 пайыз қазақ тілді балабақша қашан болатынын сұраған.

«100 пайыз қазақ тілінде дегеннің артында әрбір баланың тағдыры мен ата-ананың сұранысы бар. Ол бір күнде іске асырылмайды. Келешекте ата-аналардың тарапынан қай тілде баласына тәрбие беру қажет деген сұранысына қарай кезең-кезеңімен жүзеге асырылады. Бұл бағытта жұмыс жалғасып жатыр. 100%-ға жететін уақыт та келеді. Алдағы 3 жыл, 5 жыл бола ма – барлығы уақыттың еншісінде. Қоғамның дайындығы, ата-аналардың дайындығына байланысты»,– деп жауап берді Ерте жастағы балаларды дамыту институтының директоры Манара Адамова.

Сондай-ақ брифингте көпқабатты үйдің бірінші қабатында балабақша ашу мәселесі көтерілді. Мектепке дейінгі білім департаментінің директоры Наталья Жұмаділдаеваның айтуынша, мәжіліс депутаттарының бастамасымен заң жобасы әзірленген. Құжатта мектепке дейінгі тәрбие беру нысандарын көпқабатты үйдің бірінші қабатында орналасуға рұқсат беру туралы норма енгізілген.

«Мұндай жағдайда құрылыс салушы бірден балалар серуенге шыға алатын аймақты айқындауы қажет. Ол жер нысанаға лайықталуы керек. Қазірдің өзі кей балабақшаның тұрғын үйдің бірінші қабатында орналасқаны туралы жағдай кездеседі. Санитарлық-эпидемиологиялық бақылау комитетімен бірлесе бұл мәселе қаралып жатыр. Себебі мектепке дейінгі тәрбие беру ұйымдарында ережелер бар. Ол жерде барлық талап жазылған», – дейді маман.

Еліміздегі бүгінгі күнде балабақшалардың 69%-ы мемлекеттік тілде білім береді.