Алматы - Куала-Лумпур тікелей рейсі ашылады
Бүгінде мегаполис әлемнің 82 елімен 42 тікелей бағыт және визасыз режим орнатқан.
Наурыз айында Алматы мен Куала-Лумпур тікелей әуе қатынасын ашу жоспарлануда, деп хабарлайды Алматы қаласының әкімдігі.
«Алматыда шетелдік туристер ағынының деңгейіне әсер ететін факторлардың бірі - қолданыстағы әуе қатынасының саны. Алматы қаласы туризм басқармасының басшысы Ғалия Тоқсейітова атап өткендей, бүгінде мегаполис әлемнің 82 елімен 42 тікелей бағыт және визасыз режим орнатқан»,- делінген хабарламада.
Ғ.Тоқсейітованың айтуынша, туризмді дамытудың негізгі факторының бірі - маусым айында Алматы қаласы халықаралық әуежайының жаңа терминалының құрылысын аяқтау. Әуежайдың жалпы өткізу қабілеті жылына 14 млн жолаушы.
Осылайша, 2024 жылы шетелдік туристер саны 520 мың адамға жетеді деп болжануда.