Алматы тауларында құтқарушылар екі адамды қар астынан алып шықты

Өңірдегі төтенше жағдайлар басқармасының мәліметінше, бүгін түскі сағат 13:28 шамасында Алматы қаласының «109» құтқару қызметі Медеу ауданы, Тұйықсу жоғары таулы аймағында «Молодежный» шыңында қар көшкіні түскені және қар астында екі адам қалып қойғаны туралы ақпарат келіп түскен. Құтқарушылардан құралған 31 маман, 8 техника, 2 кинологиялық топ, 1 дрон мен 1 тікұшақ таулы аймақта іздестіру жұмыстарын жүргізген.

Құтқару қызметінен жіберілген жасақ сағат күндізгі 3-тен кейін қар астынан бір адамды аман алып шыққан. Кешкі сағат 6 шамасында екінші адамның мәйіті табылған. Алдын ала мәліметке сейкес, қайтыс болған адам Франция азаматы. Олар Алматы тауларына шаңғы тебу мақсатында шыққан.

Төтенше жағдайлар басқармасы қар көшкінінің себебін де түсіндіре кетті. Тауға 6 адам бірге шығып сырғанаған. Салдарынан қар қозғалып, көшкін жүрген. Олардың бесеуі Франция азаматы, біреуі қазақстандық. Төрт адамның қар көшкінінен дін аман шыққан.

Айта кетейік, 29 наурыздан бастап Алматы тауларында қар көшкіні жүруі мүмкін деген ескертулер жасалған. Қауіп әлі де сейілген жоқ.