Әскери қызметшілердің зейнет жасы 5 жылға өседі

Қазақстанда әскери қызметшілердің зейнет жасын 5 жылға ұлғайтуға болады.  Қорғаныс министрлігі Зейнетақы орталығының басшысы Қайыржан Бимолдин осылай деді.

«Үкімет бекіткен ең басты норма - барлық әскери қызметшілер мемлекеттік бюджет арқылы зейнетақы тағайындау жүйесіне көшті. Бұрын 2016 жылға дейін жинақтау жүйесінде болғанбыз. Бұл - өте жақсы жетістік деп ойлаймын. Зейнет жасы бойынша ұзарту «Әскери қызметшілердің мәртебесі туралы» заңда қарастырылған. Биыл ол заңға өзгерістер енгізілді. Соған сәйкес, әскери қызметшінің жасын 5 жылға дейін созуға болады", - деді министрлік өкілі.

Қ.Бимолдин әскерилердің зейнетақысы  қалай есептелетініне де тоқталды. Оның айтуынша, зейнетақы мөлшері әскери қызметшінің еңбек өтіліне байланысты.

«Егер 25 жыл еңбек өтілі болса, әскери қызметшіге 50 пайыз зейнетақы тағайындалады. Ал 25-тен астам әр жылға 2 пайыздан қосылып отырады. Мысалы, 30 жыл еңбек өтілі бар әскери қызметшіге өзінің алып отырған жалақысының 60 пайыз зейнетақы тағайындалады", - деді ол.

Айта кетейік, зейнетақыны көтеру «Зейнетақымен қамсыздандыру туралы» заңның 4-бабының 4-тармағында қарастырылған. Бимолдиннің айтуынша, өсудің нормаларын немесе пайызын қаржы жылына арналған республикалық бюджет бекітеді.