"2025 жылға қарай халықтың сапалы ауыз суға қол жеткізу мәселесін толығымен шешіледі", - деді Үкімет отырысында Премьер-Министр Асқар Мамин. Халық бұндай уәделерге әбден тойған. Бірақ ештеңе етпейді. Уәдесін бере берсін. 2025 жылға дейін төрт жыл ғана қалды. Маминнің бұл уәдесін сусыз отырған ел ешқашан ұмытпайды. Орындалғанын көреміз.
«Сумен жабдықтау және су бұру мәселелері Үкіметтің стратегиялық міндеті және халықтың өмір сүру сапасын жақсартуға тікелей әсер етеді. Жалпы елде орталықтандырылған сумен жабдықтау қалаларда 97,2, ауылдарда 86,4 пайыз. «Нұрлы жер» мемлекеттік бағдарламасы бойынша 2025 жылға қарай халықтың 100 пайыз сумен жабдықтау қызметімен қамтамасыз етіледі. Осының арқасында біз халықтың сапалы ауыз суға қол жеткізу мәселесін толығымен шешеміз«, - деді Асқар Мамин.
Сумен жабдықтау мәселесінің әлеуметтік маңыздылығын ескере отырып, әр әкімдіктің елді мекендерге, әсіресе, тұрғындары аз ауылдарға тиісті инфрақұрылымды жеткізу бойынша нақты жоспарлары болу керек екен. "Осы мәселедегі маңызды фактор топтық су құбырларының инфрақұрылымын жасау және ауылдардың шекарасына дейін жеткізу керек. Бұл жұмыс желілерді елдімекендердің ішінде тартумен үйлесімді жүруі қажет. Жауапты министрліктер мен әкімдіктер, бірінші кезекте, артта қалған өңірлер осы мәселені ерекше бақылауда ұстасын", - деді Мамин.
Бірақ біздің министрліктер бір мәселені бақылауда ұстаудан үнемі жалтарып отырады. Кеше ғана газдың тартылуына біз жауапты емеспіз деген Атамқұлов бүгін ауыз судың тартылуына жауапты бола қалыпты.
Біз бір кездері дамыған елу елдің қатарына кірмек болғанбыз. Оны да мерзімінен бұрын орындап, отыздыққа ұмтылып барады екенбіз.
Бізге бір кездері бүкіл елде интернет жақсы болады деген...
Бізге бір кездері 2020 жылы бәрі жеткілікті болады деген...
Бізге... бізге... көп нәрсе айтылған...
Ал 2025 жылы Асқар Мамин қандай қызметте болады. Оны да Құдай біледі. Ол кезде жауапкершілік те басқа адамда болмақ...
Байланысты жаналықтар
MalimBlocks
