DEMOSCOPE қоғамдық пікірге жедел мониторинг жүргізу бюросының «Қазақстандықтардың АЭС құрылысы туралы пікірі» тақырыбында жүргізген сауалнамасына сәйкес, қазақстандықтардың жартысынан көбі бұл құрылысқа қарсы.
«Сауалнамаға 2021 жылы 19-26 қыркүйек аралығында 14 облыс пен республикалық маңызы бар қалаларда (Нұр-Сұлтан, Алматы, Шымкент) тұратын 18 жастан асқан 1100 адам қатысты. Қатысушылардың 53%-ы ер азамат, 47%-ы әйел. Зерттеуде Қазақстан бойынша стационарлық телефон нөмерлерінің абоненттік қоры пайдаланылды», - делінген бюро хабарламасында.
Президент Қасым-Жомарт Тоқаев соңғы жолдауында 2030 жылға қарай Қазақстанда электр энергиясының тапшылығы болатынын айтып, бұл жағдайда әлемдік тәжірибеге сәйкес, тиімді жол - бейбіт атом деген болатын.
Ал сауалнама нәтижесіне сүйенсек, 55% қазақстандық атом электр станциясының салынуына қарсы. Олардың 36%-ы Қазақстан АЭС секілді объектілерді салуға дайын емес деп есептейді. Дегенмен, жалпы алғанда 40% қазақстандық президенттің бастамасын қолдайтын болып шыққан.
Қазақстанда атом электр станциясын салу туралы мәселелер соңғы бірнеше жыл бойы талқыланып келеді. Көп жағдайда атом энергетикасын тиімді пайдаланатын дамыған елдердің тәжірбиесі мысал ретінде келтіріледі. Одан бөлек, ауқымды халықаралық жоба жүзеге асырылатын болса, онда энергия тапшылығының орнын толтыруға және Ресеймен қарым-қатынасты жақсартуға көмектесетіні жиі айтылады. Қарсы тарап кауіпсіздік жағын сөз етіп, экономикалық жақтарын талқыға салып жүр. Сауалнама қатысушыларының 8%-ы АЭС құрылысы экономикалық тұрғыда мүлдем тиімсіз екенін айтқан.
