Бүгін Түркістан облысы Сайрам ауданында 102 қызметіне отбасылық жанжал бойынша қоңырау түскен. Жергілікті БАҚ ақпаратына сүйенсек,
қоңырау шалған тұрғынның қызы мен ажырасып кеткен күйеубаласы жанжалдасып, ер адам қызын пышақпен қорқытып, кепілге алған. Сондай-ақ, автокөлігімен Батыс Қытай-Батыс Еуропа трассасы арқылы өзінің тұрғылықты жері – Қызылорда облысына қарай бағыт алған. Сонымен қатар, бұрынғы әйелін «өлтіремін» деп қорқытқан.
«Күдіктінің талабы оны қудаламау мен жауапқа тартпау болды. Кепілге алынған адамды босату мақсатында тез арада жедел штаб құрып, «Арлан» арнайы жасақ күшімен Шымкент қаласындағы «Асар» ықшамауданының маңында күдікті ұсталып, жәбірленуші босатылды. Қылмыс кезінде жәбірленуші мойын тұсынан жеңіл дене жарақатын алып, ауруханаға жеткізілді. Онда оған медициналық және психологиялық көмек көрсетілді. Күдікті қамауға алынды», - деп жазды БАҚ.
Мәлімет бойынша, күдікті мен жәбірленуші бұрын некеде болған. 2021 жылы ажырасқан, 3 баласы бар. Күдікті бұрын екі рет сотталған және лудоманиямен ауырады.
Видео: Түркістан облысы полиция департаменті
