Кентау қаласында бітіруші түлектер ұйымдастырған заңсыз автошеру полиция назарынан тыс қалмады, деп хабарлайды Malim.kz.
Мониторинг барысында бірнеше көлік жүргізушісінің жол қозғалысы ережелерін өрескел бұзғаны анықталды.
Тексеру нәтижесінде BMW, Toyota, Mercedes-Benz, Changan, Chevrolet және Hyundai көліктерінің жүргізушілері жолаушыларды тасымалдау талаптарын сақтамаған, қауіпсіздік белдігін тақпаған және маневр жасау ережелерін бұзғаны белгілі болды.
Құқық бұзушыларға қатысты әкімшілік хаттамалар толтырылып, көліктер айыптұраққа қойылды.
Сондай-ақ полиция қызметкерлері түлектер мен олардың ата-аналарына жол қауіпсіздігі мен қоғамдық тәртіпті сақтау жөнінде түсіндіру жұмыстарын жүргізді.
Тәртіп сақшыларының жедел әрекетінің арқасында жол-көлік оқиғаларының алдын алып, азаматтардың өмірі мен денсаулығына қауіп төндіретін жағдайларға жол берілмеді.
