Бокстан ерлер ұлттық құрамасының бас бапкері болып Қайрат Сәтжанов тағайындалды. Бұған дейін бұл қызметті Ғалымбек Кенжебаев атқарып келген еді.
Отыз жылдан аса бапкерлік тәжірбиесі бар Сәтжанов 2019 жылдан бері бокстан Қазақстан жастар құрамасының бас бапкері болған. Екі жыл ішінде оның спортшылары Азия чемпионатында екі рет командалық есепте жеңіске жетіп (2019 ж. - 6/1/2, 2021 г. - 8/2/2), әлем чемпионатында екінші орынды иеленді(2021 ж. - 2/2/1).
Айта кетейік, бұған дейін экс-бас бапкер Кенжебаев қызметтен кететіні жайлы әлеуметтік желіде жазба жариялап, оны артынша өшіріп тастаған болатын.
Ғалымбек Кенжебаев бас бапкерлікке 2018 жылы тағайындалып, құрамаға ол жетекшілік еткен жылы Қазақстан алғаш рет бокстан Олимпиада алтынын ала алмады. Токио Олимпиадасында Қазақстан еншісіне тек Қамшыбек Қоңқабаев пен Сәкен Бибосынов жеңіп алған екі қола тиді.
