Парижде 9-орын алған теннисші Астанадан 2 бөлмелі пәтерге ие болды

Үстел теннисі федерациясы спортшыны Парижде жарқын әрі сәтті өнер көрсеткені үшін марапаттады, деп хабарлайды Malim.kz.

Қазақстандық спортшы Кирилл Герасименкоға Астанада екі бөлмелі пәтер сыйға тартылды. Федерацияның айтуынша, спортшы Париждегі Олимпиада ойындарында жарқын әрі сәтті өнер көрсеткені үшін марапатталды.

Олимпиадада ұлттық команданың басты ойыншысы Кирилл Герасименко ерлер арасындағы жекелей сында 9-орын алған болатын. Бұған дейін қазақстандықтардың ешқайсысы мұндай нәтижеге қол жеткізбеген. Сондай-ақ Герасименко әлемдік рейтингтегі позициясын 46-дан 37-ге дейін жақсартты.

«Біздің спорт үшін бұл тарихи оқиға. Турнир барысында Кирилл ерік-жігердің мызғымас күшін, сөзсіз шеберлігін, кәсібилігін және нағыз спорттық талантын көрсетті. Ол үстел теннисінің қазақстандық шеберлері әлемдегі ең мықты спортшылармен лайықты бәсекелесе алатынын көрсетті», — деп түсіндірді Қазақстан Үстел теннисі федерациясының президенті Данияр Әбілғазин.

instagram.com/ttfrk