Мемлекеттік қызмет істері агенттігінің баспасөз қызметінің хабарлауынша, 2021 жылғы президенттік кадр резервіне жастарды іріктеудің бірінші кезеңі аяқталып, екінші кезеңі 6 қазанда өтпек.
Алғашқы іріктеу - «қабілеттерді тестілеуде» жастар мәтін бойынша тест тапсырған, сегіз және одан да жоғары балл жинаған үміткерлер келесі кезеңге өткен. Бірінші кезеңнің қорытындысы 4 қазанда pk.rezerv.gov.kz платформасындағы әрбір үміткердің жеке кабинеттеріне жолданбақ.
Екінші кезең 6 қазан күні өтіп, үміткерлер сандық тестілеу тапсырмақ.
Мемлекет басшысының тапсырмасына сәйкес Мемлекеттік қызмет істері агенттігі 2021 жылы Президенттік жастар кадр резервіне екінші іріктеуді жүзеге асырып келеді. Іріктеу қорытындысы бойынша мемлекеттік секторға 50 резервші жұмысқа алынады.
Президенттік жастар кадр резервінің мақсаты – қоғамдық мүдде жолында жұмыс істей алатын қабілетті жастарды анықтау, оларды ел қызметіне тарту.
Іріктеуге осы жылы 8638 адам құжат тапсырып, тіркеуден өткен.
