Үшінші мегаполисте жаңа ашылған ғимараттар жайлы, мекемелер туралы жиі естуге болады. Наурыз мерекесі қарсаңында қалада тағы бір орталық – дәстүрлі ұлттық өнер мектебі ашылды. «Қаратау» деп аталатын мектептің ашылуына қала әкімі Мұрат Әйтенов және зиялы қауым өкілдері қатысты.
Өнер мектебінің басты мақсаты, атынан да белгілі, төл өнеріміз бен мәдениетімізді насихаттау, дәстүрлі өнерді әр бағыт бойынша дамытып, жастарды ұлттық құндылықтарға жақындата түсу. Мектепте қобыз, айтыс, шертпе күй секілді арнайы кабинеттер бар.
«Халықтық дәстүрлі өнер - бұл біздің мәдени мұрамыз. Ұлттық өнер арқылы өскелең ұрпақтың бойына қазақтың дәстүрі мен тұрмысын, адамдық мінезін сіңдіре аламыз. Ата-бабадан мирас болған ұлттық болмыс пен ұлттық өнерді ұмыт қалдырмаудың бір жолы – оны жастарға үйрету. Біз бүгін екі тарихтың ортасында тұрмыз. Бұл мектептен кешегі Майлықожа, Мәделідей ақындар, Сүгір мен Төлегендей күйшілер, Тәушен мен Әселхан апаларымыздай айтыскер қыздар шығады деп үміттенеміз. Осындай үлкен үмітпен сенім артып, жас келсе іске деп, мектептің тізгінін өз ұлдарыңыз, өнердің ыстық-суығында әбден шыңдалған, өткір тілді айтыскер ақын, «Дарын» мемлекеттік жастар сыйлығының иегері Біржан Байтуовқа тапсырғалы отырмын. Бұл үлкен жауапкершілік. Ескі өнерді тірілтіп, жаңа заманға алып шығатын, Қаратау өнерін жаңғыртатын, Шымкенттің ғана емес Қазақтың атын әлемге шығаратын шәкірттер шығуына тілектеспін», - дедi Мұрат Әйтенов.
Айта кетерлігі, бұл мектеп о баста саз мектебі ретінде ашылмақ болған. Құрылыс жұмыстары жүріп жатқанда, бұл ғимаратты тек саз мектебі емес, дәстүрлі ұлттық өнер мектебі етіп ашуды қала әкімінің өзі тапсырған. Бұл мектеп енді 10 бағыт бойынша жұмыс істейді. Айтыс, поэзия, дәстүрлі ән, жыр-терме, домбыра, қобыз, жетіген, көркем сөз, көшбасшылық, сахна тілі, кино және театр, ұлттық, классикалық би өнері, ағаш, былғары, тоқыма, тігіншілік, кескіндеме, графика, композиция, эстрада, классика, фортепиано, сольфеджио, анимация, кино, ролик сияқты өнер түрлерін үйрететін болады.
Байланысты жаналықтар
MalimBlocks
