Қазақстанның белгілі мемлекет және қоғам қайраткері, Алматы қаласының алғашқы әкімі Заманбек Нұрқаділовтің отбасында қуанышты жаңалық орын алды. Бұл туралы оның қызы, танымал дизайнер Құралай Нұрқаділова әлеуметтік желідегі парақшасында хабарлады, деп жазады Malim.kz.
Құралай Нұрқаділова алғаш рет әже атанып, немересінің дүниеге келгенін сүйіншіледі. Ол бұл қуанышты сәтті оқырмандарымен бөлісіп, ақжарма тілектерін жеткізген.
Желі қолданушылары да бұл жаңалыққа бейжай қарамай, жылы лебіздерін білдірді. Көпшілік жаңа туған сәбиге амандық тілеп, "бесік бауы берік болсын", "бақытты ғұмыр кешсін" деген сынды ақ тілектерін жаудырды.
Айта кетейік, Құралай Нұрқаділова – Қазақстандағы сән индустриясында өзіндік орны бар тұлға. Ол "Kuralai" сән үйінің негізін қалаушы, сондай-ақ Қазақстанның Ұлттық сән палатасының атқарушы директоры ретінде танымал. Оның шығармашылығы отандық сән әлемінің дамуына айтарлықтай үлес қосып келеді.
Ал оның әкесі Заманбек Нұрқаділов – ел тарихында маңызды із қалдырған саяси қайраткер. Ол тәуелсіз Қазақстандағы Алматы қаласының алғашқы әкімі болып қызмет атқарып, мемлекет дамуына сүбелі үлес қосты.
