Мәжіліс депутаты, Әлеуметтік-мәдени даму комитетінің төрағасы Асхат Аймағамбетов ғылым саласына тікелей әсер ететін маңызды жаңалықпен бөлісті, деп хабарлайды Alash.kz.
Депутаттың айтуынша, жұмыс тобы еліміздегі ғылыми жүйені ұзақ жылдар бойы мазалап келген өзекті мәселені шешетін маңызды норманы қабылдаған. Енді заң жобасы Мәжілістің Пленарлық отырысында қолдау тапса, ғылыми жобалардың мерзімі мен қаржыландыруы толық көлемде сақталатын болады.
Бұрынғы проблема неде еді?
Ғылыми конкурстардың өткізілуі тым созылып кететін – кейде 9-10 айға дейін ұзайтын.
"Мысалы: жобаға 36 айға ақша бөлінді. Бірақ конкурс созылып, келісімшарт қарашада ғана жасалды. Сондықтан, 36 ай болған зерттеу мерзімі – 26 айға дейін қысқарады. Осыған байланысты, сол 36 айға есептелген зерттеуге қажет қаражаттың 100 пайызының – іс жүзінде 70-80 пайызы ғана ғалымға жетеді", – деді Асхат Аймағамбетов.
Бұл нені білдіреді?
Бұл өз кезегінде зерттеу мерзімін "сығуға" мәжбүр етеді, нәтижеге әсерін тигізеді, материал, жалақы және жабдыққа қаржы жетпей қалады, қаражаттың бір бөлігі бюджетке кері қайтады.
"Бұл мәселе жылдар бойы шешілмей келген. Себебі – Бюджет кодексі қаражатты келесі жылға автоматты түрде көшіруге рұқсат бермейтін. Өткен жылы жаңа Бюджет кодексін қабылдағанда, мен қаржыны келесі жылға толық көлемде көшіруге мүмкіндік беретін норманы ұсындым. Бұл норманы депутаттар қолдап, ол қабылданды. Енді осы мүмкіндіктің арқасында біз "Ғылым туралы" заңға ғылыми жобаның мерзімі келісімшарт жасалған күннен бастап есептеледі және бүкіл мерзімді толық қамтиды деген норманы ұсынып, бүгін жұмыс тобында қабылдадық", – деді депутат.
Жаңа түзетуге сәйкес ғылыми жобаның мерзімі келісімшартқа қол қойылған күннен бастап есептеледі. Жоба толық 36 ай (немесе қанша ай қарастырылса – сонша) жұмыс істейді. Қаражат та сол кезеңге толық көлемде сақталады. Жалақы да, зерттеу шығындары да толық өтеледі.
"Ғалымдарда тұрақтылық пен жоспарлау мүмкіндігі артады. Зерттеу сапасы жақсарады. Жалақы мен шығындар толық қамтылады. Елге қажет ғылыми нәтижелер толық көлемде іске асады. Қазақстан ғылымы жүйелі түрде нығаяды", – деді Асхат Аймағамбетов.
