Жамбыл облысында кәмелетке толмаған баланың анасы ұлынан пышақ табылғаны үшін жазаланды, деп хабарлайды Malim.kz.
Рейдтік іс-шаралар барысында әйелдің колледжде оқитын кәмелетке толмаған ұлының шалбарының артқы қалтасынан жиналмалы пышақ табылған.
«Осыған байланысты оның заңды өкіліне қатысты әкімшілік құқық бұзушылық туралы іс қозғалды. Криминалистің анықтамасына сәйкес, пышақ зауыттық тәсілмен жасалған және суық қаруға жатпайды», - деп жазылған хабарламада.
Сот сонымен қатар осы жылдың маусым айында кәмелетке толмағаннан пышақ табылғанын және анасының ӘҚБтК 127-бабының 1-бөлігі бойынша жауапкершілікке тартылғанын анықтады. Сотта әйел кінәсін мойындап, ұлымен әңгімелесуге уәде берді.
Сот кінәсін мойындағанын, кәмелетке толмаған балаларының болуын, ауырлататын мән-жайлардың жоқтығын ескеріп, айыппұл мөлшерін 30%-ға азайтты.
«Сот қаулысымен ата-ана ӘҚБтК 127-бабының 2-бөлігі бойынша кінәлі деп танылып, оған 41 мың теңге көлемінде әкімшілік айыппұл салынды», - дейді сот.
Қаулы заңды күшіне енген жоқ.
