Қазақстанда жаздың соңғы күндері ауа райы күрт өзгереді. Алдағы үш күнде еліміздің бірқатар өңірінде жаңбыр жауып, найзағай ойнайды, деп хабарлайды Malim.kz.
Кей жерлерде бұршақ жауып, жел күшеюі мүмкін. Солтүстік пен шығыста кезең соңына қарай жаңбыр аралас қар жаууы ықтимал. Бұл туралы «Қазгидромет» 29-31 тамызға арналған ауа райы болжамында хабарлады.
Синоптиктердің мәліметінше, атмосфералық фронттардың өтуіне байланысты Қазақстанның басым бөлігінде жауын-шашын болады. 29 тамызда Ақмола, Қостанай және Қарағанды облыстарында, ал 30-31 тамызда Павлодар және Шығыс Қазақстан облыстарында қатты жаңбыр жаууы мүмкін.
Қазақстанның батысында жауын-шашынсыз ауа райы сақталады. Батыс, солтүстік-батыс, солтүстік және шығыс өңірлерде түнде және таңертең тұман түседі.
Солтүстікте үсік жүреді
Алдағы күндері солтүстік-батыс, солтүстік және орталық өңірлерде ауа температурасы төмендейді. Түнде температура +10...+15 градустан 0...+5 градусқа дейін түседі. Кезең соңында кей жерлерде -3 градусқа дейін үсік жүруі мүмкін.
Күндіз ауа температурасы +15...+25 градустан +10...+15 градусқа дейін төмендейді.
Шығыс Қазақстанда да күн суытады. Түнгі ауа температурасы +10...+15 градустан +5...+10 градусқа дейін, ал күндіз +25...+35 градустан +15...+25 градусқа дейін төмендейді.
Батыс пен оңтүстікте күн жылы болады
Батыс өңірлерде, керісінше, күн жылынады. Мұнда күндізгі ауа температурасы +18...+23 градустан +25...+30 градусқа дейін көтеріледі.
Маңғыстау облысында күндіз ауа температурасы +25...+35 градус шамасында сақталады.
Қазақстанның оңтүстік өңірлерінде де жылы ауа райы жалғасады. Түнде ауа температурасы +10...+20 градус, ал күндіз +25...+35 градус болады.
Осылайша, жаздың соңғы күндері еліміздің солтүстік және шығыс бөлігінде күзгі салқын ауа райы орнап, кей өңірлерде алғашқы үсік жүруі мүмкін.
