21 қазан Қазақстан тарихында мәдениет, ғылым және халықаралық ынтымақтастыққа қатысты бірқатар оқиғамен есте қалған. Бұл күні еліміздің алғашқы жел атласы таныстырылып, Қаныш Сәтбаевқа ескерткіш ашылды. Malim.kz тілшісі осы күнге қатысты маңызды оқиғаларды ұсынады.
2003 жыл – елордада Transport Tower ашылды
21 қазанда Астанада Transport Tower әкімшілік-технологиялық кешені ашылды. Ерекше пішінімен көзге түсетін ғимарат елорданың сәулет нысандарының біріне айналды.
2004 жыл – Семейде алып байпақ жасалды
Семейдегі "Роза" кәсіпорны ерекше көлемдегі байпақ жасап шығарды. Оның өлшемі – 106, қонышының биіктігі 178 сантиметр, ал салмағы 16,5 келі болған. ҚазАқпарат күнтізбесінде бұл бұйым сол кездегі әлемдегі ең үлкен байпақ ретінде көрсетілген.
2009 жыл – Қазақстанның алғашқы жел атласы таныстырылды
Астанада еліміздің тұңғыш жел атласының таныстырылымы өтті. Интерактивті карта Қазақстан аумағындағы желдің жылдық орташа жылдамдығы туралы мәлімет беруге арналған. Ол жел электр станцияларын орналастыруға қолайлы аумақтарды анықтауға мүмкіндік берді.
2011 жыл – Қаныш Сәтбаевқа ескерткіш ашылды
Қарағандыда ғалым, қоғам және мемлекет қайраткері Қаныш Сәтбаевтың ескерткіші ашылды. Бұл оқиға Қазақстан ғылымының дамуына зор үлес қосқан тұлғаның еңбегін ұлықтауға арналды.
2011 жыл – Түркі кеңесінің алғашқы саммиті өтті
Алматыда Түркітілдес мемлекеттер ынтымақтастық кеңесінің бірінші саммиті ашылды. Жиынға Қазақстан, Әзербайжан және Қырғызстан басшылары қатысты. Кездесу қорытындысында Алматы декларациясына қол қойылды.
2012 жыл – «Алтын адам» көрмесі таныстырылды
Қазақстанның мәдени күндері аясында Ыстанбұл археологиялық музейінде "Ежелгі көшпенділер алтыны және Қазақстанның зергерлік өнері" атты көрме таныстырылды. Экспозиция қазақ жерінің көне мұрасы мен зергерлік дәстүрін шетелдік көрерменге таныстыруға бағытталды.
1959 жыл – Гуггенхайм музейінің әйгілі ғимараты ашылды
Әлем тарихында да бұл күнге қатысты елеулі оқиға бар. 1959 жылғы 21 қазанда Нью-Йорктегі Соломон Гуггенхайм музейінің жаңа ғимараты келушілерге есігін ашты. Сәулетші Фрэнк Ллойд Райт жобалаған ғимарат өнер туындыларымен қатар өзінің ерекше сәулетімен де танылды.
